高雄 5 大最正購物商場

統一夢時代購物中心規模屬全亞洲數一數二，佔地 40 萬平方米，匯聚眾多知名國際品牌，同時又係娛樂中心，從電影院到健身室，以至名為「高雄眼」嘅屋頂摩天輪等等，可謂應有盡有。

購物方面，呢座商場設有約 2,300 間商店，當中涵括來自台灣同全球各地嘅中價至頂級品牌。除咗 10 個購物樓層外，地底兩層尚設美食廣場，而各式各樣嘅餐廳則遍佈整座購物中心各處。

新堀江商圈係新一代年輕人最愛嘅購物區，位於玉竹街一帶，場內嘅商店同小販專售嶄新科技產品，而且價格相當便宜。如果你想搜購電子產品，就一定要到此一遊！

另一方面，新堀江商圈仲設有 3 間知名品牌美容店，以及幾間時裝店。到咗夜晚，呢區就會化身成為夜市，架設起各種各樣嘅小食檔，令你流曬口水！

興達港觀光漁市距離高雄市中心都幾遠，即使開車前往，亦需頗長時間—不過，如果你有意品嚐最新鮮嘅海產，此行絕對值回票價！你可以喺漁市內買到螃蟹、生蠔 (牡蠣)、蝦、章魚、鰻魚同各種魚類，而小食檔則有售海鮮小食，又以烏魚子同比目魚乾為必試地道名物。每逢週末，興達港觀光漁市都會變得人山人海，水洩不通！

南華夜市位於新興區大同路同南華路附近，可謂一眾女士嘅購物天堂，設有多種多樣嘅服裝首飾店，貨色價格合理，而你仲可以「講價」一番！雖然場內亦有適合男士同兒童嘅商品，惟絕大多數攤檔皆以女性為主要客路。行到肚餓？呢度仲有一啲食品攤檔，可讓你「醫一醫肚」！

六合夜市係台灣嘅著名景點，定必令你著迷！呢片夜市「出名」之處在於露天食肆，尤其以海鮮檔特別人潮洶湧，又以鰻魚意粉為必試之選。

「飲飽食醉」之後，你仲可以到處行吓，搜羅手工藝品、電子設備同埋刀具，甚至連馬騮仔都買得到！六合夜市與眾不同，部分攤檔奉行「以物易物」，你可以將用過嘅二手物品帶嚟，交換成有用又耐用嘅「新收穫」。